One Man Show 15 NOV 2019 真人版《小丑》 失控大笑病患者的催淚故事


睇咗《小丑》嘅,都會對由頭帶到尾嘅Joaquin Phoenix嘆為觀止。

據講,片中嘅狂妄笑聲,佢用咗3種手法去演繹,

帶出主人翁Arthur嘅狀態。

 

Arthur因為有病而不能自控地狂笑,

現實中真係有人患呢個病。

美國男子Scott患上多發性硬化症,其中一項病癥係情緒調節障礙(PBA),

有時會不能抑制地笑,最長可以維持十分鐘。

因為呢個病,Scott生活上有時都幾唔方便。

有餐廳唔歡迎佢要求離開,因為女待應覺得被冒犯︰

去酒吧飲嘢,笑到停唔到的話,有人會覺得Scott笑緊自己,

爭啲打大交。

 

最慘嘅莫過呢一幕。

2003年,Scott喺訂婚派對後揸車途中,酒後駕駛嘅司機撞向佢架車。

同車嘅Scott未婚妻當場死亡,媽媽就身受重傷,3日後不治。

喺現場,面對家破人亡,Scott無法控制身體,不停大笑……

《小丑》一片爆紅,令唔少人認識到呢種「大笑病」。

Scott覺得Joaquin Phoenix演得好到位,尤其是Arthur喺巴士上病發一幕,

Scott好似睇緊自己日常生活咁。

 

雖然呢個病令佢受人白眼,但係Scott認為自己嘅生活,

同平常人一樣有高低起跌,佢已經懂得將不能自已嘅大笑,

轉化成同屋企人一齊嘅快樂。